Саяси бюро

Танымал тэгтер: , , , , ,

Құрылыс саласын «төңкеріс» күтіп тұр

0 376

Арқа жұртшылығын екі ай бойы әбігерге салып қойған аптап ыстық ептеп басылғандай болғанымен, Үкіметтің «қызуы» басыла қоймады. Олай дейтініміз, кешегі отырыста Үкімет мүшелері айналасы бір сағат 56 минуттың ішінде алты бірдей заң жобасын мақұлдап жіберді...

Баяндамашылардың көшін әдеттегідей экономикалық даму және сауда министрі Жанар Айтжанова бастап шықты. Айтжанованың айтуынша, осы жылдың бірінші жартыжылдығында Жалпы ішкі өнімнің нақты өсімі көп ілгері кетіпті. «Үстіміздегі жылдың бірінші жартыжылдығында Жалпы ішкі өнімнің нақты өсімі 8 пайызды құрады. Атап айтқанда, жыл басынан бергі екі ай ішінде өнеркәсіп өндірісі өткен жылғы тиісті кезеңмен салыстырғанда 11 пайызға өсті. Бұл сауда айналымының – 13,3 пайызға, ал көлік қызметінің көлемі 6,8 пайызға өсуін, сондай-ақ отандық тұтынушылар мен нақты сектордағы кәсіпорындар тарапынан сұраныстың жоғарылағанын көрсетеді», – дейді министр ханым.

Бұған, әрине, халықаралық ұйымдардың әлемдік экономиканың 2010 жылғы өсуі және мұнай, металл сияқты Қазақстанның негізгі экспорттық тауарларының әлемдік бағаларының өсуі әсер еткен. Министр сондай-ақ еліміздің тек импорттық әлеуеті ғана емес, экспорттық қарымы да құлаш жаза бастағанын айтты. Бұл сөзін министр мынадай деректермен дөңгелектеді: «2010 жылғы экспорт көлемі болжам бойынша 51,4 млрд АҚШ долларын құрап, алдыңғы болжаммен салыстырғанда 1,8 млрд АҚШ долларына жоғары болады деп күтіліп отыр».

Жол-көлік апаты 8 пайызға азаймақ

Бұдан кейін отырғандардың назары көлік және коммуникация министрі Әбілғазы Құсайыновқа ауды. Олай дейтініміз, ол көлік инфрақұрылымын дамыту жөніндегі бағдарламасын таныстыру барысында еліміздің жол қауіпсіздігі іс-шараларын қолға алудың арқасында «2015 жылға қарай жол-көлік апаттарын 8 пайызға дейін төмендетуге болады» деген «батыл болжам» жасап жіберді.

Әбілғазы Қалиақпарұлының сөзіне қарағанда, 2010-2014 жылдарға арналған еліміздің көлік инфрақұрылымын дамыту саласындағы салалық бағдарлама аясында республикалық маңызы бар жолдардың 5,5 мың шақырымы қайта жаңартылып, 6 мың шақырымы, жергілікті маңызы бар жолдардың 10 мың шақырымы қайта жөнделеді. Жаңа Кендірлі әуежайы салынып, еліміздің әуе көлік паркін 18 әуе ұшағымен толықтыру жоспарланған. Осылайша, 2015 жылға дейін әуе ұшақтарының саны 45 бірлікке дейін артады. «Еліміздің көлік саласындағы жол қауіпсіздігі іс-шараларын қолға алудың арқасында 2015 жылға дейін жол-көлік апттарын 8 пайызға дейін төмендету көзделген», – деп атап көрсетті Ә.Құсайынов.

Жәмішев не дейді?

Үкімет қабырғасында көптен бері қазақ тілінде баяндама жасап, тілін сындырып жүрген қаржы министрі Болат Жәмішев бұл жолы да мемлекеттік тілге құрмет білдірді. Министр бас-аяғы 7 минутқа созылған 2010-2012 жылдарға арналған республикалық бюджетке өзгерістер мен толықтырулар енгізу туралы заң жобасын таныстыру барысында бірде-бір орысша сөз қоспауға тырысты.

Министрше айтсақ, «2010 жылдың республикалық бюджеті 139 млрд теңгеге өсіпті». Осылайша, республикалық бюджетке келіп түскен жалпы қаржының көлемі 3 трлн 517 млрд теңгеге жеткен. «Қолданыстағы бюджетпен салыстырғанда, бұл 139 млрд теңгеге, яғни 4,1 пайызға артық. Шығыстар – 4 трлн 321 млрд теңге, ал бюджет тапшылығы 803 млрд теңгені құрады», – деді Б.Жәмішев.

Болат Бидахметұлы бұл қаржының 17,7 млрд теңгесін біраз уақыттан бері басылмай тұрған үлескерлер дауын шешуге жұмсауға бел буыпты. Оның бұл ұсынысы отырғандарға бірден ұнап қалды. Премьер-министрдің бірінші орынбасары Өмірзақ Шөкеев мұндай қаржыға құрылыс саласында «төңкеріс жасауға» болатынын айтып салды. «Келесі жылы құрылыс саласында өте үлкен реформалар жасаймыз. Тіптен «төңкеріс» деуге де болады. 2011 жылдан бастап «эуро кодтар» енгіземіз. Барлық құрылысшылар, жобалаушылар баламалы түрде осы кодтарды пайдаланады. Осылайша, 2014 жылға дейін отандық құрылыс саласы толықтай осы жүйеге көшетін болады. Алайда бұл бағдарлама ескі кадрларға ұнамауы мүмкін. Өздеріңіз білесіздер, біздегі құрылыс саласы бұған дейін ескі стандарттар бойынша жұмыс істеп келді. Ең алдымен, солармен күресіп алуымыз керек», – дейді Өмірзақ Естайұлы.

Бұл құжат та мақұлданды. Отырғандар бірауыздан қолдап, Премьер-министр Кәрім Мәсімов қол қойды. Сондай-ақ кешегі Үкімет отырысында тағы екі құжат мақұлданды. Олар индустрия және жаңа технологиялар вице-министрі Берік Камалиев таныстырған 2010-2014 жылдарға арналған құрылыс индустриясы саласын және құрылыс материалдары өндірісін дамыту және жеңіл өнеркәсіпті дамыту жөніндегі бағдарлама болатын. Бағдарламаның бірі ішкі нарықтың отандық құрылыс материалдарына қажеттілігін 80 пайызға қанағаттандыру, жалпы қосылған құнды – 76 пайызға, саладағы еңбек өнімділігін 40 пайызға арттыруға негізделсе, екіншісінде ішкі нарық сұранысын қанағаттандыру, өнім шығару және сыртқы нарыққа шығу міндеттері қарастырылған.