Соңғы жаңалықтар

Танымал тэгтер: , , , , ,

Орман өрті 6 адамды жалмап кетті

0 297

Павлодар облысында орман өртінен алты адам қаза болды. 8 қыркүйек күні Көкжал ормандарында тілсіз жауды ауыздықтау кезінде кешкі сағат 18:20-лар шамасында орманшы, Бесқарағай орманының мемлекеттік инспекторы өмірмен қоштасты.

Жабағылы ауылынан 21:50-де аудандық ауруханаға ауыр күйік шалған үш адам жеткізіліп, оның екеуі бірден қайтыс болды. Дәрігерлердің айтуынша, бұлар – ағалы-інілі Нұрбаевтар. Олардың аналары да қазір ауруханада ауыр халде жатыр. Кеше өрт болған жерден тағы да бір мүрде табылды, бұл Нұрбаевтар отбасының отағасы деген болжам бар.

Маралды ормандарында соқалы МТЗ-100 тракторының көмегімен өртпен алысқан екі адам – Бесқарағай орманының директоры мен Шарбақтының бір тракторшысы да ажал құшты. Өрт кезінде хабарсыз кеткен екі адам қазір іздестірілуде.

Өрт Шарбақты ауданына қарасты Шалдай ормандарының 1000 гектарын жалмап, Ресей аумағына да ауыз сала бастаған. Қазір өрттен зардап шеккен Бәйімбет ауылының тұрғындары Шоқтал ауылына көшірілді. Кеше сағат 15.25-тің кезінде Бесқарағай ауданындағы Көкжал орманды алқабында тағы бір өрт ошағы пайда болып, 2000 гектар орман алқабына зиянын тигізген.

Кереку өңірін әлекке салған тілсіз жаудың тырнағы Шығыс Қазақстанға да жетті. Көрші өңірден келген өрт бұл облыстың Беген ауылдық округіне жетіп, 400 гектардан астам орман алқабын шарпып кетті. Естеріңізде болса, шамамен осыдан төрт жыл бұрын Бегенге өрт тиіп, әп-сәтте 90-ға жуық түтіні бар аядай ауылды тып-типыл еткені мәлім.

Абырой болғанда, бұл жолы бегендіктер жылдам қам жасап үлгерді. Өрт қаупі төнген Жандос ауылынан 64 адам көшірілді.

Қазір Павлодар жақтан келген өрт толығымен ауыздықталыпты. Шығысқазақстандық өртсөндірушілер қараша халыққа тілсіз жаудан сақтанудың жолын айтып, насихат жұмыстарын жүргізуге кірісті.

Оқиға орнына келіп жеткен төтенше жағдайлар министрі Владимир Божко барлық жауапты қызметтерге әрбір екі сағат сайын жағдайды баяндап отыруды тапсырды. Өрт сөндіруге Төтенше жағдайлар министрлігінің авиациясы да жұмылдырылды. Сондай-ақ орман шаруашылықтарымен, жергілікті билік органдарымен байланыс орнату, өртке қарсы техниканы қажетті сумен және жанармаймен қамтамасыз ету қатаң қадағалануда. Жұмысты үйлестіру облыс әкімінің орынбасары, Төтенше жағдайлар жөніндегі облыстық комиссия төрағасы А.Вербнякқа жүктелді.

Автор: Елмейір Ахмед, Жанаргүл Қадырова, Шығыс Қазақстан және Павлодар облыстары