Соңғы жаңалықтар

Танымал тэгтер: , , , , ,

11 балақай уланып қала жаздады

0 283

Қарағандыға қанаттас Шахтинск қаласындағы «Салтанат» балабақшасының 11 тәрбиеленушісі тағамды дұрыс мәзірлік режимде тұтынбағандықтан, «уланған» деген диагнозбен қалалық аурухананың жұқпалы аурулар бөліміне жатқызылған.

Оқиға осыдан бір апта бұрын болғанына қарамастан, балабақша басшылығы болған оқиғаны жасырып келген. Болған жайт ата-аналар балаларының денсаулығына алаңдап, дабыл қаққанынан кейін ғана жария болып отыр. Қазір осы оқиғаға байланысты Білім және ғылым министрлігінен арнайы тексеріс келеді деп күтілуде.

Шынтуайтында, балабақша тәрбиеленушілеріне тағамдық сапалары өзара сәйкеспейтін тамақтар берілген екен. Мәселен, балаларға түскі ыстық аспен бірге алма берілген, сондай-ақ сүтке бұқтырылған макарон өнімдеріне басытқы ретінде шие шырыны ұсынылған, ең сорақысы, көкөністен әзірленген уылдырыққа тәтті айран қосып берген.

«Уланып» қалған үш жастан алты жасқа дейінгі ортаншы буын топтарының тәрбиеленушілерінің денсаулығы қазір жақсы. Аталмыш тамақ мәзірінің балалардың денсаулық жағдайына әсері туралы зертханалық тексерістерден кейін толық баға берілмекші.

Гүлжан БАЙТУҒАНОВА, Қарағанды облыстық санитарлық бақылау басқармасының эпидемиологиялық қадағалау бөлімінің меңгерушісі:

– Бұл тағамдық улану емес. Тек тағам рационы дұрыс таңдалмаған. Тағам балалардың ішіне жақпаған. Ал ата-аналар бұл жағдайға сенгісі келмей отыр. Барлық жағдай зертханалық тексерістерден соң анықталады.

Автор: Серік САҒЫНТАЙ, Қарағанды