Өркениет

Танымал тэгтер: , , , , ,

Білмеймін, кімнің рөлін ұсынса, соны ойнаймын...

0 405

Нұрғиса Елеубеков (фото)

Фархад ӘБДІРАЙЫМОВ, актер:

Қазіргі уақытта Алматы кинотеатрларында «Қызғылт қоян туралы хикая» атты жаңа кинофильмнің көрсетілімдері өтуде. Көрерменге енді ұсынылып отырған туынды аз уақыт ішінде біраз мақталып та, сыналып та үлгерді. Жас режиссер Фархад Шәріповтің үлкен киноға жасаған қадамына сәттілік тілеп, біз де өз тарапымыздан кезінде аталған фильмнің премьерасына барып, өз пікірімізді білдірген болатынбыз.

Бір қуанарлығы, фильмді түсіру жұмыстары бастан аяқ Ш.Айманов атындағы «Қазақфильм» киностудиясының техникалық жаңарған қондырғыларымен жүзеге асырылған. Қосымша назар аударар жайт, киностудия басшылығы соңғы уақыттарда, әсіресе, жас киногерлерге айрықша сенім арта бастады. Фархад Шарипов те сол есепте өзінің дебюттік жұмысымен үлкен киноға алғаш қадам жасау бақытына ие болып отыр. «Қазақфильм» басшылығының қолдауы мен қамқорлығы аясында түсірілген осы «Қызғылт қоян туралы хикая» әлі талай әңгімелер мен қызу пікірталастарға арқау болары сөзсіз. Алайда біз бүгін тартысты сөздерді былай қоя тұрып, фильмдегі жағымсыз кейіпкерлердің бірін сомдаған танымал киноактер Фархад (Фара) Әбдірайымовпен аз-кем ой бөліскен едік:

– «Қызғылт қоян туралы хикая» атты жастар драмасында сіз елеулі рөлдердің бірін сомдадыңыз, сіздің актерлік қорыңыздан бұл Джайбархан рөлі елеулі орын ала ала ма?

– Бұл жөнінде айту ертерек. Әуелі оны көрермендер бағалағаны дұрыс. Меніңше, «еңбегіміз далаға кетпеген сияқты».

– Бұл Фархад Шариповтің бірінші толықметражды фильмі екені белгілі, дебютантпен жұмыс істеу қиын болған жоқ па?

– Фархадпен бұрыннан таныспын. Біз көрші едік. Ноутбугін арқалап алып, өзінің алғашқы дипломдық жұмысына актер ретінде ойнап беруімді өтініп, аулада соңымнан жүгіргені есімде. Мен басында біраз бұлталақтап көрдім де, сосын, көндім. Ақыры көрерменге де жетті ғой. Жалпы, фильм сәтті шықты десе, артық айтпаған болармын?! Сол кездің өзінде-ақ Фархад болашағы бар режиссер екенін байқатқан еді. Біле-білсеңіздер ол «Қызғылт қоян туралы хикая» атты фильмді аз ғана қаражатқа түсіріп, айтарлықтай дүние жасай алды. Бұл – қолдауға тұрарлық қадам. Өз басым бұған таңғалдым. Кейбір актерлер режиссердің жас әрі тәжірибесіз екенін көрген кезде оған ақыл үйретіп, түзету жасауға аңсары ауып тұратыны бар емес пе? Меніңше, актер режиссерге сеніммен қарау керек. Режиссер – түсірілім тобындағы не түсіріп жатқанын терең түсінетін жалғыз адам. Мен өз басым режиссер жас болсын, тәжірибелі болсын, мейлі, берген тапсырмасын бұлжытпай орындауға тырысуды әдет еткенмін.

– Сіз айтулы шеберлердің де, жастардың да картиналарына түсіп жүрсіз. Сіздің жас талаптың тырнақалды ізденісіне неліктен ықыласыңыз ауды: қызық сценарий болғандықтан ба, гонорар көлеміне бола ма, жоқ, жай ғана жас режиссерге көмектесуге ұмтылыс па?

– Әрине, бұл – біріншіден жас өскінге көмектесуге ұмтылыс. Қазір жастар талантты, зерек, олардың таным-түсінігі бөлек. Киноның басты табысы – көрермендер көңілін өзіне аудара білу. Жастарда осы мәселе жақсы қисынын тапқан. Ал гонорар мәселесі соншалықты маңызға ие емес, олай болған жағдайда бүкіл фильм бюджеті менің еңбекақыма айналар ма еді...

– Сізді жағымды рөл қызықтыра ма, жоқ, жағымсыз рөл көбірек еліктіре ме?

– Мен үшін барлық рөл қызықты. Мен ешқашан «маған мынадай рөл керек еді» деп сұраған да емеспін, таңдаған да емеспін. Қашан да «актер – ойналмаған рөлдері мен жасалмаған кейіпкерлерімен қадірлі» деген сөз менің көкейімде тұрады. Сол себепті, рөл мен жанрдың қандай түрінен болса да бас тартпаймын.

– Классикалық персонаждардан кімді ойнар едіңіз?

– Классикадан Лир патшаны ойнасам деймін... Неге дейсіз ғой? Өйткені бұл кейіпкер маған ұнайды. Басқа ештеңе емес. Мүмкін, Гамлетті... Білмеймін, кімнің рөлін ұсынса, соны ойнар едім.

– Қазір қандай жұмыс үстіндесіз?

– Жақында ғана Егор Кончаловскийдің «Қара майор» фильмінің дыбысталу жұмыстарында болдым. Кинокадрларына қарасаң, Ауған соғысы жайлы керемет кинотуынды жасалып жатқаны аңғарылады. Нағыз блокбастер дерсің! Алдағы уақытта жаңа шытырман оқиғалы фильмге түсу үшін Чехия еліне шақырту алдым. Онда мен «Порше» автокөлігіне мінген барлаушыны ойнаймын…

– Әңгімеңізге рақмет! Шығармашылығыңызға сәттілік тілейміз.