Өркениет

Танымал тэгтер: , , , , ,

Ақадырдан табылған алғашқы олжа

0 297

Жәнібек ауданы аумағындағы Ақадыр-2 көне қорымына қазба жүргізген батысқазақстандық археологтар үлкен олжаға кезікті. Осындағы 46 қорымның бірінен ересек ер мен әйелдің және екі баланың сүйектері табылды.

Қазба кезінде табылған қола жебенің ұшына қарап ғалымдар бұл мүрделер темір дәуіріне, яғни б.э.д. V ғасырларға жатады деп отыр. Ер адамның жауырыны астынан сынған қол айна, әйел адамның жанынан қыш ыдыс, ұршықтың басы, әйнек моншақ шықты. Табылған жәдігерлер енді арнайы сараптамадан өткізілмек. Қорым құрылысының өзі қызық. Ені үш, биіктігі бір жарым метр болатын обаның іші ірілеу қыш тастармен көмкеріліпті. Тастардың арасы құммен толтырылған.

Жалпы, Ақадыр-2 Жәнібекте қазылған үшінші қорған. Жалпы ұзындығы 1200 метр болатын қорымдар шоғыры Ақадыр ауылынан үш шақырым жерде жатыр.

Яна ЛҰҚПАНОВА, Батыс Қазақстан облыстық тарих және археология орталығының ғылыми қызметкері:

– Қабірден қыш құмыралар таптық. Біреуінде тіпті тамақтың қалдықтары сақталып қалған екен. Құмыра жуан ортасына дейін түсі сары тағаммен толтырылған. Өкінішке орай, ыдыстағы тесіктен ол сыртқа төгіліп қалған. Мұны айналасындағы топырақтың сары түске боялуынан көруге болады.

Автор: Тоқтар КЕНЖЕҒАЛИЕВ, Орал