Алаш-ақпарат

Танымал тэгтер: , , , , ,

Елбасы елордадағы жаңа тұрғын үй кешендерін аралады

0 284

Кеше Елбасы Нұрсұлтан Назарбаев Астанадағы «Солтүстік шұғыласы» тұрғын үй кешені мен биылғы жылы қарашада пайдалануға берілетін «Изумрудный квартал» деп аталатын 39 қабатты әкімшілік корпусы кешенін аралап көрді.

Солтүстік шұғыласы» тұрғын үй кешені 165 бизнес-кластық пәтерден тұрады, оның 30 пәтері үлескерлерге тиесілі. Қалған 135-і алдағы кезде сатып алу құқығы негізінде жалға берілетін болады. Барлық пәтерлер толық әрленген әрі қоныстану үшін дайын. «Изумрудный кварталдың» жалпы алаңы 112 мың шаршы метр. Бұл екі нысанның қаржыландырылуы «Самұрық-Қазына» жылжымайтын мүлік қоры» АҚ тарапынан Астана қаласындағы құрылыс объектілерін аяқтау жөніндегі дағдарысқа қарсы мемлекеттік бағдарлама аясында жүргізілді. Брифинг барысында Президент журналистерге Астананың жаңа әкімшілік орталығы құрылысының жоспары туралы айтып берді. «Бұл жерде «Хабар» агенттігі, «Қазақстан» корпорациясы орналасатын медиаорталық салынатын болады. Мұнда өзге де телекомпаниялар көшіп келеді. Осында фильмдер жасалып, қоғамдық іс-шаралар өткізілетін, заманауи студиямен жабдықталатын жаңа медиакешен орналасатын болады, – деді Елбасы. Сонымен қатар Оқушылар сарайы, Қазақстан тарихының мұражайы, опера және балет театры және өзге де ғимараттар бой көтермек. Мемлекет басшысы өз сөзінде «Қазақстанның Тәуелсіздігінің 20 жылдығына орай елордада спорт, денсаулық сақтау, әлеуметтік-мәдени мақсаттағы жаңа нысандар пайдалануға беріледі» – деп атап өтті.

Автор: Жарқын ТҮСІПБЕКОВ