Алаш-ақпарат

Танымал тэгтер: , , , , ,

Ректор гранты табыс етілді

0 277

Әл-Фараби атындағы Қазақ ұлттық университетінде ректор грантының иегерлері анықталды. Биыл оған үміткерлер саны былтырғыға қарағанда бес есе көп. Өткен бейсенбіде оқу орны басшысының грантын жеңіп алған 90 талапкер ҚазҰУ студенті атанды.

Биыл 3200 мемлекеттік білім гранты иегерін оқуға қабылдаған ҚазҰУ жетекші білім ордасы ретінде отандық білім кеңістігіне жанашырлық танытып, тағы 90 балаға ректор грантын тапсырып отыр. Олардың 64-і – “Алтын белгі” иегерлері, қалғаны – халықаралық және республикалық олимпиадалардың жеңімпаздары. Талапкерлерге грант тапсыру рәсімінде оқу ордасының ректоры Бақытжан Жұмағұлов: «Бұл үміткерлер мемлекеттік байқау кезінде таңдаған мамандықтарына грант бөлінбей қалғаны үшін жазықты емес. Сол үшін біз – университет ғалымдары, декандары мен оқытушы-профессорлар құрамы ақылдаса келіп, осындай ұйғарымға келдік. Оларға университет жыл сайын 67 млн теңге қаржы бөледі», – деген пікірін жеткізді.

Мәдина ЖАКИТОВА, грант иегері:

– ҚазҰУ – менің бала күннен бергі арманым. Еліміздегі бірінші университетке түсу үшін мен мектепте үнемі ізденіс пен үздік оқу үстінде болдым. Міне, сол еңбегім бүгін жүзеге асты. Студенттік жылдарымда Қазақстанның бәсекеге қабілетті маманы болып қалыптасып шығатыныма сенемін.

Автор: Саягүл ӘЛІМБЕКОВА